= Buletini i FSFE-së - Dhjetor 2014 =
[ Lexojeni online: https://fsfe.org/news/nl/nl-201412.sq.html ]
== Më shumë kërkesë nga institucionet e BE-së ==
Komisioni i ri Europian po përcakton drejtimin e politikave të veta për pesë vitet e ardhshme. FSFE-ja është në kontakte të shpeshta me stafin e Komisionit, që sheh në Bruksel rreze drite për Software-in e Lirë. Duam të arrijmë ta përdorim këtë impuls për të nxitur ndryshime në prokurimin e software-it, standardizimin e tij, dhe për zgjedhje të lirë pajisjesh. Për këtë, presidenti ynë, Karsten Gerloff mori pjesë në disa takime.
Në Nëntor Parlamenti Europian (PE) organizoi një konferencë për të njohur eurodeputetët me shërbimet TI që mund të përdorin në parlament. Gjatë konferencës u zhvilluan diskutime të drejtuara nga Adina Valean, zëvendëspresidentja e re PE-së, e ngarkuar me TIK-un, dhe një pjesëmarrje nga Giancarlo Villela, drejtori i seksionit TI të PE-së. Pas diskutimeve, Karsteni pati mundësinë të bëjë disa shënime të shkurtra rreth transmetimit të drejtpërdrejtë nga institucione të BE-së, DebianParl-i dhe bllokimeve nga ana e tregtuesve[1].
Në fillim të Dhjetorit Karsteni qe sërish në Parlament, këtë radhë në praktikën mbi “Standarde të Hapura për prokurimet TIK”[2]. Vlera e njëmendtë e këtyre veprimtarive, siç ndodh shpesh, qe te njerëzit e pranishëm aty. Praktika ofroi për bashkësinë e vogël që ushtron trysni për Software të Lirë dhe Standarde të Hapura një mundësi për t’u takuar dhe shkëmbyer të rejat. Në këtë mënyrë, në të ardhmen mund të punojmë tok me ta për ndryshime pozitive.
== Nuk ka re, thjesht kompjuterët e të tjerëve ==
Një tjetër veprimtari në të cilën mori pjesë Karsteni qe paraqitja e raportit mbi punimin në “re” me kompjuterat dhe ndërveprueshmërinë, nga ana e organizmit lobues me bazë Brukselin, ECIS. Karsteni e dokumentoi takimin në postimin e tij të blogut “Disa rekomandime të arsyeshme lidhur me funksionimin në re të kompjuterëve”[3].
Vetëm pak ditë më pas, ngjitësat tona të rinj “nuk ka re, thjesht kompjuterët e të tjerëve” mbërritën në zyrën tonë[4]. Na erdhën mjaft përshtypje të mira për këta ngjitësa, dhe i kemi shtuar tani te paketat tona promocionale[5]. Kemi në plan të shtojmë disa artikuj të tjerë me këtë slogan, gati për stendën tonë në FOSDEM, nga 31 Janari më 1 Shkurt 2015, në Bruksel.
== Përparim me fletëpalosjet “vetëmbrojtje email-i ==
Përveç ngjitësave të rinj, tani mund të porositni edhe fletëpalosje të reja, për promovimin e “udhërrëfyesit mbi vetëmbrojtjen e email-it”, punuar nga organizmi ynë motër. Fillimisht këtë fletëpalosje e prodhuam në gjermanisht, për manifestimin vjetor të Berlinit në Shtator, “liri, jo frikë”. Më pas, vullnetarë nga krejt Gjermania porositën[6] dhe shpërndanë të tillë. Për shembull, në një kinema dhanë një fletëpalosje për cilindo që bleu një biletë për dokumentarin mbi Snowden-in, “Citizienfour”. Ndërkohë na u desh të riporositnim versionin gjermanisht për herë të tretë dhe që prej fundit të Nëntorit kemi dërguar versionin anglisht për përkrahës të Software-it të Lirë kudo në Europë.
Në javët e ardhshme përkthyesit[7] dhe grafistët[8] tanë do të përfundojnë versione në Kinezçe, Holandisht, Frëngjisht, Greqisht, Italisht dhe Spanjisht. Për 2015-n dëshirojmë t’u krijojmë mundësinë përkrahësve vendorë të Software-it të Lirë ta shpërndajnë këtë dhe fletëpalosje të tjera në biblioteka, universitete, shkolla, kinema, kompani, restaurante dhe kafe, dyqane dhe vende të tjera.
== Përkthyesit e FSFE-së: janë thjesht të shkëlqyer ==
Kjo na sjell te një shënim kaq të nevojshëm falënderimi. Gjatë 12 muajve të fundit kemi botuar çdo muaj buletinin. Dy nga botimet u shkruan nga vullnetari ynë Heiki ”Repentinus” Ojasild, që redaktori juaj të shijonte edhe ai pushimet. Buletini ynë, mesatarisht, mund të kihet në 6 gjuhë (4 gjuhë, më e pakta, 9 gjuhë më e shumta). Kemi botuar buletine në Anglisht, Frëngjisht, Greqisht, Gjermanisht, Holandisht, Italisht, Portugalisht, Rumanisht, Serbisht, Spanjisht, dhe Shqip.
Redaktori juaj është krenar që punon me një ekip vullnetarësh kaq të përkushtuar. Ata përkthejnë buletinin, fletëpalosjet e përmendura më sipër, plus lajme të tjera nga FSFE-ja. Ata u krijojnë mundësinë më tepër njerëzve anembanë botës të lexojnë për Software-in e Lirë në gjuhën e nënës, dhe ndaj janë pjesë kyçe e FSFE-së. Ndaj redaktori juaj do të donte ta falënderonte thellësisht ekipin tonë në lulëzim të përkthyesve[9] për këtë vepër të rëndësishme.
== Diçka krejt tjetër ==
- Viti thuajse ka mbaruar, dhe është koha të raportojmë. Presidenti ynë botoi një përmbledhje paraprake të asaj çka arritëm gjatë 2014-s[10] që mbulon punën tonë mbi: prokurimet publike, paktin për Software të Lirë, rrugëzuesit e detyruar, përmirësimin e materialeve informative, informimin e publikut lidhur “punimin e besueshëm në kompjuter” dhe “Nisjen e Sigurt”, organizimin e Ditës së Lirisë së Dokumenteve, përgjigjet për pyetjet ligjore, si dhe pjesëmarrjen tonë në veprimtari të tilla si praktika, diskutime, ose organizime stendash.
- Në buletinin e fundit ju kërkuam të na ndihmonit me fushatën FixMyDocuments. Me mbështetjen që morën, kanë përpiluar një listë nga institucionet europiane, me mbi 15 mijë dokumente të përpunueshëm, që nuk gjenden në Formatin e Hapur të Dokumenteve (ODF)[11].
- WhatsApp futi në përdorim një metodë kodimi të sigurt skaj-më-skaj të krijuar për aplikacionin Software të Lirë TextSecure. Torsten Grote i hedh një vështrim domethënies së kësaj për Software-in e Lirë[12].
- Veprimtari vendore: FSFE-ja mbajti hapur një stendë te T-Dose, në Holandë[13]. Anëtarët tanë shok holandezë e rregulluan vetë stendën, Kevin Keijzer mbajti një fjalë rreth “Diskriminimit të (përdoruesve të) Software-it të Lirë në arsim”, Maurice Verheesen foli rreth “Sovranitetit Dixhital Për Europën”, ndërsa Felix Stegerman foli rreth mundësive dhe rreziqeve të “Internetit të Gjërave”[14]. Përtej kësaj, grupi ynë i Berlinit organizoi një stendë në FiFFkon[15], në Universitetin Teknik të Berlinit.
- Guidoja botoi një përmbledhje mbi gjëra nga fusha e arsimit nëpër Europë, gjatë Tetorit[16].
- Anëtari shok frëng Alexandre Keledjian botoi F-Droid-Web, një ndërfaqe e thjeshtë dhe e lehtë për shërbyesin F-Droid[17]. Ajo ofron një rrugë të lehtë për të shtuar një depo të re software-i te celulari juaj duke përdorur kode qr, dhe për të shfletuar katalogun F-Droid sipas emrash, kategorish, përmbledhjesh, llojesh licence dhe përshkrimesh.
- Nga grumbullimet planet[18]:
- Mirko Böhm, anëtar shok, dhe anëtar i bashkësisë KDE, shkroi rreth pse do të duhej të përkrahnit punën e FSFE-së[19], që sipas fjalë të tij është: që ajo të mbrojë, shpjegojë dhe organizojë liritë e përdorimit, studimit, ndarjes me të tjerët dhe përmirësimit të software-it.
- Daniel Pocock shtron pyetjen nëse Amnesty po u jep viktimave të spiunimit një ndjenjë të rreme sigurie[20]. Në postimin e tij ai paraqet edhe një gjedhe letre që mund t’i dërgohej Amnesty-së.
- “EOMA68” është një standard i hapur ndërfaqesh elektronike, i hartuar për mbështetje të zhvillimit të pajisjeve të vogla kompjuterike. Nico Rikken shkroi se pse EOMA68 do të shpjerë përpara si Software-in e Lirë, ashtu edhe hardware-in e lirë[21].
- Mario Fux shpjegon se si mund të kontribuoni si joprogramues te KDE-ja[22].
- Veç këtyre, kemi prej grumbullimeve planet disa HowTo teknike, përfshi: Kevin Keijzer që raporton përvojën e tij nga përpjekja për të instaluar Ubuntu-në pa software pronësor[23].
- Hannes Hauswedell që shkroi rreth se si të shifrohen në FreeBSD email-et e përditshme të dërguar nga cron[24]. HowTo-ja e tij lidhe veçanërisht me FreeBSD-në, por ai është “i sigurt se krejt përdoruesit e GNU-së do të zbulojnë ndryshimet e nevojshme”.
- Mirko Böhm që përshkruan se si të formësohet një mi për lojëra në GNU/Linux, në një mënyrë që të mund të punoni dhe luani te makina[25].
- Dhe Max Mehl që tani xhiron Git-in e vet (një sistem të papërqendruar kontrolli versionesh), që përfshin gjithashtu një program për të fshirë krejt tejtëdhënat nga kartela PDF brenda një drejtorie[26].
== Aktivizohuni: Merrni një kartë të mençur dhe na përkrahni ==
Vitin e ardhshëm, do të ushtrojmë më shumë trysni më shumë trysni se kurrë për ndërthurjen e lirisë së software-it në indet e shoqërisë tonë. Për t’i bërë të mundur organizmit të intensifikojë punën e vet me Komisionin Europian dhe të rrisë numrin e personave të ndjeshëm ndaj Software-it të Lirë, dhe për të vazhduar punën tonë na duhen ende 190 mijë euro për 2015-n[27].
Si një individ, rruga më e mirë për të përkrahur financiarisht punën e FSFE-së është të bëheni një Anëtar Shok (anëtar që, veç të tjerash, kontribuon ekonomikisht te FSFE-ja)[28]. Puna e FSFE-së për një shoqëri të lirë përfiton drejtpërsëdrejti nga të gjitha kontributet e Anëtarësisë Shok.
Anëtarëve Shok u jepet një kartë të mençur Anëtarësie Shok, e fjalës së fundit, e cila, tok me software-in e lirë GnuPG për kodime dhe me një lexues kartash, mund të përdoren për të nënshkruar dhe koduar email-e, për hyrje të sigurt përmes SSH-së në një kompjuter prej një makine potencialisht të pasigurt, ose për depozitimin e kyçeve të shifrimit të hard diskut të përdoruesit. Meqë kyçi i kodimit është i depozituar te vetë karta, është thuajse e pamundur të vidhet.
Falënderojmë krejt vullnetarët[29], Anëtarët Shok[30] dhe korporatat dhuruese[31] që bëjnë të mundur punën tonë, Matthias Kirschner - FSFE